वीरगन्जमा बम विस्फोट, एक भारतीय घाइते

वीरगन्ज : वीरगन्जको मेनरोडमै रहेको एक घरमा मंगलबार साँझ बम विस्फोट भएको छ । जिल्ला प्रहरी कार्यालय र नेपाली सेनाको ब्यारेकबीचको मेनरोडमा रहेको कमल राउत कुर्मीको घरमा साँझ ५ बजेतिर बम विस्फोट भएको हो । बम विस्फोट भएको घर जिल्ला प्रहरी कार्यालय र नेपाली सेनाको ब्यारेकबाट करिब दुई सय मिटरकोबीच दुरीमा अवस्थित छ ।
विस्फोटमा  भारत बिहारको छपराका १८ वर्षीय अमितकुमार पाण्डे घाइते भएका छन् । उनको वीरगन्जस्थित नारायणी उपक्षेत्रीय अस्पतालमा उपचार भइरहेको छ ।
त्यो घर एक महिनाअघि मात्र कुर्मीले किनेका थिए । कुर्मीले किनेको घर मातृका आई सेन्टरले आखाँ अस्पताल सञ्चालनका लागि भाडामा लिएको थियो ।
आई सेन्टर सञ्चालनका लागि भाडामा  लिएको घरको कोठामा मंगलबार पाण्डेले रंगरोगन गरिरहेका अबस्था सुतली बम विस्फोट भएको पर्साका प्रहरी नायब उपरीक्षक राजन लिम्बुले बताए ।
बम विस्फोट कसले र किन गराएको भन्ने बारेमा केही खुल्न नसकेको पर्साका प्रहरी प्रवक्ता समेत रहेका  लिम्बुले बताए ।उनले  विस्फोटनको बारे अनुसन्धान भइरहेका जानकारी दिए । annapurna post