पत्रकार अधिकारीलाई धम्काइएको प्रति प्रेस चौतारीको आपत्ति

पोखराका पत्रकार रञ्जन अधिकारीलाई समाचारको विषयमा धाकधम्की आएकोप्रति प्रेस चौतारी कास्कीले आपत्ति जनाएको छ ।
पत्रकार अधिकारीले गण्डकन्यूज डटकमका लागि गत साउन ६ गते बुधबार ‘काहुँको कालिका माविमा व्यापारः सरकारी अनुदान लिने, निःशुल्क किताब फर्जी बिल भिडाउँदै बेच्ने (भिडियो)’ शीर्षकमा समाचार लेखेका थिए ।

सो विद्यालयकी प्रधानाध्यापक निर्मला मानन्धरका श्रीमान् बताउने श्रीकृष्ण श्रेष्ठले लगातार फोन, म्यासेज, एसएमएस मार्फत धाकधम्की दिएको पत्रकार अधिकारीले बताएका छन् ।

पत्रकार अधिकारीलाई समाचारको विषयमा असम्बन्धित पक्षबाट धाकधम्की आएकोमा प्रेस चौतारी कास्कीले आपत्ति जनाएको छ ।

संस्थाका अध्यक्ष अर्जुन गिरीले प्रेस विज्ञप्ति जारी गर्दै समाचारप्रति चित्त नबुझे कानूनी उपचार खोज्न सुझाव दिंदै फोन, एसएमएस र म्यासेन्जरमार्फत होच्याउनु, गिज्याउनु र सरकारका उच्च तहका व्यक्तिको फोर्स लगाउने जस्ता हर्कत निकै निन्दनीय भएको उल्लेख गरेका छन् ।

साथै अध्यक्ष गिरीले यस सम्बन्धमा नेपाल पत्रकार महासंघको ध्यानाकर्षण गराउँदै पत्रकार अधिकारीलाई धम्की दिनेलाई कडा भन्दा कडा कार्वाही गर्न सम्बन्धित निकायसंग माग गरेका छन् ।