गण्डकीमा मुख्यमन्त्रीले बिहिबार विश्वासको मत लिँदै

गण्डकी प्रदेशका मुख्यमन्त्री सुरेन्द्रराज पाण्डेले भोली (बिहीबार) विश्वासको मत लिँदै छन् ।

बैशाख १४ गते गण्डकीको मुख्यमन्त्रीमा पाण्डे नियुक्त भएका थिए । उनलाइ गण्डकीका प्रदेश प्रमुख पृथ्वीमान गुरुङले संविधानको १६८ को उपधारा २ बमोजिम ३५ सांसदको समर्थनमा नियुक्त गरेका थिए ।

पाण्डेले मुख्यमन्त्रीका लागि कांग्रेस, माओवादी केन्द्र र समाजवादीका ३५ जना सांसदहरुको हस्ताक्षर सहित नयाँ सरकार गठनका लागि दाबी पेस गरेका थिए ।

अहिले कांग्रेसबाट मुख्यमन्त्रीसहित २ जना र माओवादी केन्द्रबाट एक जना मन्त्री बनिसकेका छन् । कांग्रेसबाट सरस्वती अर्याल र माओवादीबाट सुशिला सिंखडा विनाविभागीय मन्त्रीको रूपमा मुख्यमन्त्रीसँगै शपथ लिएका हुन् ।

सत्ता साझेदार दलबीच गण्डकीमा आलोपालो सरकारको नेतृत्व लिने सहमति भएको थियो । जस अनुसार पहिलो चरणमा पाण्डेले नेतृत्व गर्ने भएका छन् भने दास्रो चरणमा माओवादीका हरि बहादुर चुमान मुख्मयन्त्री बन्ने छन ।

६० सदस्यीय प्रदेशसभामा सरकार गठनका लागि ३१ सांसदको आवश्यक पर्छ । संसदमा सवैभन्दा ठूलो दलको हैसियतले कांग्रेसको २७ सीट छ ।

सभामुखसहित माओवादीको ८ सीट रहेको छ । स्वतन्त्र सांसद मनाङे पनि गठबन्धनमा छन् । यसअघि पुस २५ मा एमालेका खगराज अधिकारी मुख्यमन्त्री नियुक्त भएका थिए । माओवादी र राप्रपाको समर्थनमा उनी मुख्यमन्त्री भएका थिए ।

नयाँ सत्ता समिकरण अनुसार सरकारबाट माओवादी बाहिरीएपछि अधिकारी नेतृत्व सरकार अल्पमतमा परेको थियो ।

अधिकारीले वैशाख ९ मा विश्वासको मत प्राप्त नगरेपछि गण्डकीमा नयाँ सरकार गठनको प्रकृया अगाडि बढेको हो ।