गुणस्तरहिन सिमेन्ट बेचेको आरोपमा मारुतीका सञ्चालकविरूद्ध पक्राउ पुर्जी जारी

गुणस्तरहिन सिमेन्ट बेचेको आरोपमा मारूती सिमेन्ट उद्योगका सञ्चालक नन्दकिशोर राठीसहित ८ जनाविरूद्ध पक्राउ पुर्जी जारी भएको छ ।

कमसल सिमेन्ट बेचेर ठगी गरेको आरोपमा ठगीसम्बन्धी कसुरमा राठीका छोरालगायतलाई पक्राउ गर्न जिल्ला प्रहरी कार्यालय सप्तरीले जिल्ला अदालतबाट पक्राउ अनुमति लिएको हो ।

पक्राउ पुर्जी जारी हुनेमा मारूती सिमेन्टका प्रमुख सञ्चालक नन्दकिशोर, प्रबन्ध निर्देशक उनका छोरा अनुप, उद्योगका प्रतिनिधि लक्ष्मीप्रसाद सिवाकोटी, डिलर सञ्जय साह, सिमेन्ट बिक्री गर्ने नरेश साह, अजयकुमार साह छन् ।

बिजनेस डाइरेक्टर ज्योति शर्मा भने यसअधि नै पक्राउ परेका छन् । उनीहरूविरूद्ध असार ११ गते नै पुर्जी जारी भएको हो ।

राजविराज नगरपालिका घर भएका पत्रकार दिवाकर साहले उनीहरूविरूद्ध प्रहरीमा जाहेरी दिएका थिए । शाहले मारूती सिमेन्ट प्रयोग गरेर घर ढलान गरेपछि भत्किएपछि उनीहरूविरूद्ध जाहेरी दिएका थिए ।

प्रहरीले शाहको जाहेरीका आधारमा उनीहरुलाइ पक्राउ गरी अनुशन्धान अगाडी बढाएको हो ।