पोखरा सीधा उडानका लागि ६ पटक पत्राचार गर्दा पनि बेवास्ता गरेको कतारका राजदूतको गुनासो

नेपालका लागि कतारका राजदूत युसुफ बिन मोहम्मद अल–हेलले कतारदेखि पोखरा सीधा उडानका लागि गरेको पत्राचारको नेपालले वास्तै नगरेको बताएका छन् ।

शुक्रबार बिदाई राष्ट्रिय सभा अध्यक्ष गणेश तिमिल्सिनासँगको भेटमा उनले कतारमा कार्यरत नेपाली श्रमिकले रेमिट्यान्समार्फत् राष्ट्रिय अर्थतन्त्रमा योगदान दिएकोले वैदेशिक रोजगारीलाई सुरक्षित र मर्यादित बनाउन प्रतिबद्ध रहेको बताए ।

भेटमा राजदुतले नेपाली श्रमिकले कतारको बिकासका लागि पुर्‍याएको योगदानको प्रसंशा गर्दै बढीभन्दा बढी सुविधा उपलब्ध गराउने बिषयमा पनि गम्भीर रहेको बताए ।

उनले पोखरालगायतका विमानस्थलमा सीधा उडानका लागि कतारका एयरलायन्सहरुको चासो राखेर नेपाल सरकारका निकायहरुमा ५–६ पटकसम्म पत्राचार गरे पनि नेपाली पक्षबाट कुनै प्रतिक्रिया पाउन नसकेको गुनासोसमेत गरे ।

उनले नेपालले चासो राखेर अघि बढेमा पोखरा, भैरहवाबाट सीधा उडान नियमित गर्न कुनै समस्या नभएको बताए ।