पृथ्वीचोकदेखि विजयपुरसम्म सडक मापदण्डमा पर्ने संरचना हटाउन शुरू

पोखरा महानगरले पृथ्वीचोकदेखि विजयपुर खोलासम्म राजमार्गको दायाँबायाँ (२३ मिटर) मापदण्डभित्र परेका संरचनामाथि हटाउन सुरु गरेको छ ।

एक महिना अगाडि नै मापदण्डभित्र परेका संरचना हटाउन जानकारी दिइएको भए पनि अटेरी गरेकालाई सोमबारदेखि हटाउन सुरु गरेको हो ।

त्यस क्षेत्रमा स्थायी, अस्थायी गरेर ६० भन्दा संरचनामा डोजर लगाएर हटाउन लागिएको महानगर प्रमुख धनराज आचार्यले जानकारी दिए ।

पोखरा-मुग्लिन सडकखण्ड एशियाली विकास बैंक (एडीबी)को सहयोगमा चार लेनको बन्दैछ। बाटोका लागि एडिबीको टिम आउन लागेकाले त्यो भन्दा अगाडि राजमार्गको राइट अफ वे क्लियर गर्न महानगरले सहजीकरण गर्न लागेको मेयर आचार्यले बताए ।

सडकको दायाँबायाँ २३ मिटर मापदण्डभित्र पर्ने अस्थायी संरचना भत्काइने पोखरा महानगरले जनाएको छ। पोखरा-मुग्लिन सडकखण्ड एशियाली विकास बैंक (एडीबी)को सहयोगमा चार लेनको बन्दैछ।

२०२६ मा रेखांकन भएको यो सडक सवारीसाधनको चाप बढ्दै गएपछि एडीबीको ऋण सहयोगमा चार लेनको बनाउनका दुई खण्डमा विभाजन गरेर ठेक्का लगाइएको छ।

आँबुखैरेनी–जामुने पूर्वी खण्डको ४१.४५ किलोमिटर सडक स्तरोन्नतिको ठेक्का चाइना कम्युनिकेसन कन्स्ट्रक्सनले पाएको छ।

जामुने–पोखरा पश्चिम खण्डको ३९ किलोमिटरको ठेक्का अर्को चिनियाँ कम्पनी यनहुई काइयुआन हाइवे एन्ड ब्रिजले पाएको छ।

चार लेनको सडक सीमा दुईतर्फी २५/२५ मिटर हुनेछ।