अतिक्रमण गरिएको फिर्केखोलाको सीमांकन शुरु, एकहप्तामा प्रतिबेदन बुझाईने

पोखरा महानगरले फिर्केखोलाको पुरानो आकार खोज्न सुरु गरेको छ ।

अतिक्रमणको चपेटामा परेको फिर्केखोलाको वास्तविक आकार पत्ता लगाउन महानगरले प्राविधिक बासुदेव पौडेलको संयोजकत्वमा बनाएको टोलीले बुधबारदेखि कार्य शुरु गरेको हो ।

पौडेलको संयोजकत्वमा गठबन गरिएको १८ सदस्य समितिलाइ दुइ भागमा बिभाजन गरेर फिर्केखोलाको अन्तिमबिन्दू गाईघाटदेखि खोलाको वास्तविक मार्ग खाज्न थालिएको हो ।

समितिले फिर्के खोलाको निरीक्षण गरी २०३२ सालको नक्सालाई आधार बनाएर खोला र घरको मापदण्ड अध्यायन गरेर एकसातामै प्रतिवेदन तयार पार्ने छ ।

२४ मिटरसम्म फराकिलो रहेको फिर्के खोला पछिल्लो समय पाखरामा धनाबस्ती विस्तारसंग अतिक्रमणको चपेटामा परेको छ ।

पछिल्लो समय राजनैतिक नेतृत्वका स्वार्थका कारण खोला किनाराबाटै घरका जग उठाउने, खोलामाथि नै भौतिक संरचना निर्माण गर्ने जस्ता कार्यले अधिकांस ठाउँ अतिक्रमण गरिएको छ ।

पोखरा महानगर–१८, अँधेरी कुनादेखि सुरु भएर पस्र्याङ, मालेपटन, बुलौंदी हुँदै फेवातालमा मिसिने फिर्केखोला लामो समयदेखि मापदण्ड १० मिटर कायम छ । तर, उक्त मापदण्ड लागू गर्न नसक्दा फिर्केखोला अतिक्रमण गर्ने क्रम तीव्ररुपमा अगाडी बढेको छ ।

फिर्केखोला अतिक्रमण गरी बनाइएका घरबाट खोलामा फालिएको ढल तथा मलमूत्र सीधै फेवातालमा पुगे मिसिँदा दुर्घन्धित बनेको छ ।

खोलामा अतिक्रमणले सखाप पार्ने कार्य तीव्र रुपमा बढ्दै गर्दा मेयर धनराज आचार्यले मापदण्ड विपरीतका संरचना छिट्टै भत्काउने बताउँदै आएका छन् ।

पोखरा १८ को अँधेरीकुनाबाट सुरु भएको फिर्के खोला वडा नम्बर १७ र ६ हुदै फेवातालमा मिसिन्छ । यसको लम्बाई करिब ८ किलोमिटर भएको अनुमान गरिएपनि चौडाइ भने निरन्तर घट्दै गएको छ ।

खोलाका किनारदेखि दायाँबायाँ १० मिटरभित्र कुनै संरचना बनाउन नपाइने कानुनी ब्यवस्था भएपनि अतिक्रमण बढ्दै गएको छ ।

०३२ सालको नक्सा अनुसार फिर्केखोलाले चर्चेको झन्डै १ सय ९२ रोपनी जग्गा विभिन्न व्यक्ति, शक्ति केन्द्र, शिक्षण संस्था, सामाजिक संस्था लगायतले अतिक्रमण गरेको आशंका गरिएको छ ।

यस अघि निवर्तमान मेयर मानबहादुर जिसीले फिर्के खोलाको मपदण्द र सीमांकन गर्न महानगरका इन्जिनियर महेन्द्र गोदारको संयोजकत्वमा समिति बनाएका थिए ।

त्यो समितिले बुझाएको प्रतिवेदनमा खोला मिचेर १ सय ९२ वटा संरचना बनाइएको उल्लेख छ ।