सूर्यदर्शन सहकारी ठगी प्रकरणमा पक्राउ परेका उपाध्यक्ष दर्लामी पुर्पक्षका लागि थुनामा

सूर्यदर्शन बचत तथा क्रण सहकारी संस्थाका उपाध्यक्ष कैलाश कुमार दर्लामीलाई पुर्पक्षका लागि थुनामा पठाउन कास्की जिल्ला अदालतले आदेश दिएको छ ।

अदालतमा थुनछेक बहस सकिएपछि रामेछापको लिखु तामाकोसी गाउँपालिका– ७ घर भएका दर्लामीलाई न्यायाधीश रामचन्द शर्माको एकल इजलासले थुनामा पठाउने आदेश दिएको हो ।

दर्लामीलाई १२ पुसमा रामेछापबाट पक्राउ गरी पोखरा ल्याइएको थियो । यसअघि पक्राउ परेका सहकारीका कोषाध्यक्ष कुमार रम्तेललाई कास्की अदालतले पुर्पक्षका लागि थुनामा पठाउने आदेश दिएको थियो ।

बचतकर्ताको रकम हिनामिना गरी भएको ठगी प्रकरणको अनुसन्धानपछि सरकारी वकिलको कार्यालयले १८ असोजमा जिल्ला अदालतमा सहकारी ऐन ०७४ अन्तर्गत मुद्दा दर्ता गरेको थियो ।

एक हजार ३६ बचतकर्ताको एक अर्ब ११ करोड १९ लाख ४३ हजार ४५ रुपैयाँ ठगिएको भन्दै बचतकर्ताले प्रहरीकोमा जाहेरी दिएका थिए ।