बालकृष्ण ढुंगेललाई रिहा गर्ने निर्णयविरुद्ध सर्वोच्चमा रिट

हत्या अभियोगमा अदालतले कैद सजाय सुनाएपछि कारागारमा रहेका बालकृष्ण ढुंगेललाई रिहा गर्ने सरकारको निर्णय विरुद्ध वरिष्ठ अधिवक्ता दिनेश त्रिपाठीले सर्वोच्च अदालतमा रिट दायर गरेका छन् ।

कर्तव्य ज्यान मुद्दामा सजाय भोगिरहेका ढुंगेललाई सरकारले गणतन्त्र दिवस (१५ जेठमा) आममाफी सहित रिहा गर्ने निर्णय गरेको छ ।

दोषी करार भई सजाय भोगिरहेका व्यक्तिलाई सजायमा भारी छूट दिई रिहा गर्नु न्याय र विधिको शासनको उपहास भएको अधिवक्ता त्रिपाठीले बताएका छन् । उनले भने– “सरकारले विवेक र तर्कसम्मत रुपमा प्रयोग गर्नुपर्ने कानून बदनियतपूर्ण तरिकाले प्रयोग गरेको छ ।”

ढुंगेललाई रिहा गर्ने सरकारको निर्णय सत्ता र शक्तिको दुरुपयोग भएको त्रिपाठीले बताएका छन् ।

सरकारको यस्तो निर्णयले लोकतन्त्रको मूल्य मान्यतामा ह्रास ल्याउने र अन्तर्राष्ट्रिय स्तरमा मुलुकको छवी धमिल्याउने अधिवक्ता त्रिपाठीको भनाइ छ ।

रिटमा अन्तरिम आदेशको माग समेत गरिएको छ । मुद्दाको सुनुवाई भोलि, ११ जेठमा हुनेछ ।

himal khabar