पोखरा महानगरपालिका कार्यालयमा फ्रि वाईफाई सेवा

पोखरा, । पोखरा लेखनाथ महानगरपालिका कार्यालयमा काम विशेषले कार्यलय पुग्ने सेवाग्राहीहरुको सहजतालाई मध्यनजर गरी फ्रि वाईफाई जडान गरेकोछ।
महानगरपालिकाले सेवाग्राहीहरुमा लक्षितगरी फ्रि वाईफाई सेवा बुधबारदेखि शुरु गरेको हो । सेवा शुरु गर्दै महानगरका प्रमुख मान बहादुर जिसीले महानगरका विभिन्न सेवा वारे जानकारी लिन चाहने सेवाग्राहीले महानगरकै फ्रि वाईफाई प्रयोग गर्न सक्ने बताए । उनले अबका कार्यालयहरु प्रविधिमैत्री बन्नुको विकल्प नभएको भन्दै महानगरमा सेवा लिन आउँदा छुटेका तथा अपुग कतिपय कागजात प्रविधि मार्फत नै आदानप्रदान गर्न सकिने उल्लेख गरे ।
फ्रि वाईफाई सेवा शुभारम्भका अवसरमा महानगरका प्रमुख प्रशासकीय अधिकृत शेषनारायण पौडेलले महानगरबाट शुरु भएको फ्रि वाईफाईको सुविधा निकट दिनमा सवै वडा कार्यालयहरुसम्म पुग्ने बताए । महानगरले हाल सेवाग्राहीहरुको भीडभाड धेरै रहने राजश्व र घरनक्शा काउण्टरमा फ्रि वाईफाईको सेवा शुरु गरेको हो । सेवाग्राहीले फ्रि वाईफाई प्रयोग गर्नका लागि वाईफाई खोलेर नाम सर्च गर्दा महानगर अन्डरस्कोर टु र महानगर अन्डरस्कोर थ्रि लाई कनेक्ट गर्नसक्ने छन्।