बिश्वकपमा फ्रान्सद्धारा अर्जेन्टिनालाई ४-३ ले पराजित

फ्रान्सेली स्ट्राइकर एमबाप्पेको दुई गोलको मद्दतले एक गोलको अन्तरले अर्जेन्टिनालाई घर फर्काउँदै फ्रान्स क्वार्टरफाइनलमा प्रवेश गरेको छ जहाँ उसको भिडन्त उरुग्वे र पोर्चुगलमध्ये एकसित हुनेछ।गोलको वर्षा भएको कजानको मैदानमा फ्रान्सले ४ र अर्जेन्टिनाले ३ गोल गर्‍यो।

ग्रिजम्यानले पेनाल्टीबाट गोल गरी अग्रता लिएका थिए। तर अर्जेन्टिना मध्यान्तर हुनुभन्दा चार मिनेटअघि डि मारियाको शानदार गोलबाट बराबरी गर्न सफल भयो। उनले ३५ यार्ड परबाट बायाँ खुट्टाले प्रहार गरेको बलले पोस्ट भित्र प्रवेश गरेपछि अर्जेन्टिना खेलमा फर्किएको थियो।

मध्यान्तरसम्म खेल १-१ को बराबरीमा थियो। मध्यान्तर लगत्तै ग्याब्रियल मर्काडोले गोल गरी अर्जेन्टिनालाई अग्रता दिलाए। मेस्सीले हानेको सटमा मर्काडोले चिप गरी गोल गरेका थिए। अर्जेन्टिनाको अग्रता नौ मिनेटसम्म मात्र कायम रह्यो।

५७ औँ मिनेटमा फ्रान्समा अर्का डिफेन्डर पाभार्डले गोल गरी बराबरी गरे। उनले पोस्टको माथिल्लो छेउ च्यापेर हानेको बल अर्जेन्टिनी गोलकिपरले छेक्नै सकेनन्।

त्यसपछि चार मिनेटमा दुई गोल गरी एमबाप्पेले फ्रान्सको जित सुनिश्चित गराए। उनले ६४ औँ र ६८ औँ मिनेटमा गरेको गोल दर्शनीय थियो।तर अर्जेन्टिनाले अन्तिम समयसम्म संघर्ष जारी राख्यो। चार मिनेट थपिएको इन्जुरी टाइममा तेस्रो मिनेटमा सेर्गियो अगुएरोले गोल गरी अर्जेन्टिनाको गोल अन्तर घटाए पनि बराबरी गरी एक्स्ट्रा टाइममा खेल धकेल्न भने असफल भयो।