‘वर्तमान कम्युनिष्ट सरकार तानाशाही भयो’ सभापति देउवा

शुभेच्छा न्यूज
पोखरा । नेपाली काँग्रेसका सभापति शेरबहादुर देउवाले वर्तमान कम्युनिष्ट सरकार तानाशाही भएको आरोप लगाएका छन्। चुनावका बेला कम्युनिष्टको सरकार बने रुनपनि नपाउने आरोप लगाएका देउवाले आफ्नो नेतृत्वको सरकारले गरेको निर्णयहरु उल्ट्याएर वर्तमान सरकारले कम्युनिष्टहरुको तानाशाही प्रवृति देखाएको आरोप लगाए।

नेपाल प्रेस यूनियन रामेछापले शनिबार रामेछापको मन्थलीमा आयोजना गरेको पत्रकार भेटघाट कार्यक्रममा सभापति देउवाले केपी शर्मा ओली नेतृत्वको कम्युनिष्ट सरकारले विरोध गर्न पाउँने जनताको लोकतान्त्रिक अधिकार समेत खोसेको बताए।

नेपाली काँग्रेसले रचनात्मक प्रतिपक्षको भूमिका निर्वाह गर्ने बताउँदै उनले वर्तमान सरकारले गरेको निर्णयको विरुद्धमा अदालत, संसद र सडकमा समेत आन्दोलन गर्ने बताए।

सभापति देउवाले चीनबाट रेल आउँछ भनेर ओली सरकारले जनतालाई भुलभूलैयामा पारेको भन्दै चीनबाट नेपालमा तत्काल रेल आउँने कुनै सम्भावना नै नभएको बताए।