पोखरा बृहत सरसफाइ अभियानको ११७ औं हप्ते कार्यक्रम फेवा किनारामा

शुभेच्छा न्यूज
पोखरा । पोखरामा जारी १ सय १७ औं हप्ते बृहत् सफाइ अभियान रत्नमन्दिर परिसरमा सफाइ गरेर शनिबार सम्पन्न भएको छ।

‘हप्तामा एक घण्टा राष्ट्रका लागि स्वयंसेवा’ भन्ने नाराका साथ संचालित अभियानमा ४५ डोका प्लाष्टिकजन्य फोहरमैला फेवाताल किनारबाट निकालिएको छ।

अभियानमा गण्डकी प्रदेशका उद्योग, पर्यटन, वन तथा वातावरण मन्त्री विकास लम्सालको सहभागिता रहेको थियो।

कार्यक्रममा उपस्थित मन्त्री लम्सालले सहभागीलाई सरसफाइ र राष्ट्रिय भावनाको शपथ गराएका थिए ।
सरसफाइ अभियानमा ३ वटै सुरक्षा निकाय, मुक्तिनाथ विकास बैंक, ओम डेभलपमेन्ट बैंक, एनआईसी एशिया बैंक, गण्डकी विकास बैंक, नविल बैंक, माछापुच्छे« महिला क्लब लगायतको सहभागिता रहेको अभियान संयोजक रामबहादुर पौडेलले जानकारी दिएका छन् ।

अभियानमा नविल बैंकका तर्फबाट १० प्याकेट डिस्पोजल ग्लोब उपलब्ध गराइएको थियो ।

आगामी हप्ता हुने ११८ औं हप्ताको अभियान पश्चिमाञ्चल क्षेत्रीय अस्पतालमा हुने संयोजक पौडेलले बताए।