पोखरा उद्योग बाणिज्य संघमा चुनाबी सर्गर्मी सुरु काँग्रस कम्युनिष्टका छुट्टाछुट्टै प्यानल

शुभेच्छा न्यूज
पोखरा । पोखराका उद्योगी तथा व्यवसायीहरूको छाता संगठन पोखरा उद्योग वाणिज्य संघको आगामी ५ असोजदेखि हुने ३२औँ महाधिवेशनका लागि चुनावी सरगर्मी सुरु भएको छ ।

आजसम्म विशुद्ध राजनीतिक शाख जोगाएको पोखराको सबैभन्दा पुरानो संस्था पोखरा उद्योग वाणिज्य संघमा यसपटक भने नेपाली कांग्रेस र नेपाल कम्युनिस्ट पार्टी (नेकपा) निकटका दुई प्यानलबीच तीव्र प्रतिस्पर्धा हुने भएको छ ।

औपचारिक घोषणा नभए पनि रवीन्द्रबहादुर प्रजूको नेतृत्वमा कांग्रेस निकट व्यवसायीहरूको प्यानल तयार गरेर यसअघि नै चुनावी अभियान थालिसकेका छन् । प्रजू पोखरा महानगरपालिका–३ का कांग्रेसका तर्फबाट निर्वाचित वडाध्यक्षसमेत हुन् । उनी यसअघि पोखरा उद्योग वाणिज्य संघमा वरिष्ठ उपाध्यक्ष रहेका थिए ।

नेकपा निकटका व्यवसायीहरूले आइतबार पत्रकार सम्मेलन गरी दामु अधिकारीको अध्यक्षतामा प्यानल घोषणा गरेका छन् । अध्यक्षका दावेदार अधिकारीले प्यानल घोषणासँगै केही प्रतिबद्धताहरू पनि सार्वजनिक गरेका छन् ।

उनका अनुसार सहजपूर्वक उद्योग व्यवसाय सञ्चालन गर्न पाउने वातावरण सिर्जना गर्ने, सामाजिक उत्तरदायित्वपूर्ण व्यवसायलाई ध्यान दिएर आर्थिक विकासमा हातेमालो गर्ने, संघ, प्रदेश र स्थानीय सरकासँग समन्वय गर्दै व्यावसायिक क्षेत्रमा देखिएका समस्या समाधान गरिनेछ ।

त्यसैगरी, पोखरालाई कृषि, पर्यटन र मझौला उद्योगको हब बनाउने र अन्तर्राष्ट्रिय बजारको रूपमा विकास गर्ने, पोखरालाई शिक्षा, स्वास्थ्य र पर्यटनको सहरको रूपमा विकास गर्ने, व्यवसायीहरूको क्षमता विकासका कार्यक्रम सञ्चालन गर्ने लगायतका योजना अघि सारिएको छ ।

प्रशासनिक र कर प्रशासनले कहिलेकाहीँ समस्या पार्ने गरेको भन्दै त्यसबाट मुकाविला गर्ने, पोखराको खानेपानी शुद्धीकरण र सौर्य सडक बत्ती परियोजनालाई निरन्तरता दिने, पोखराका पार्किङ व्यवस्थापनमा सहयोग गर्ने, प्रदेश स्तरको औद्योगिक क्षेत्र निर्माणमा सहयोग गर्ने लगायतका कार्यक्रम अगाडि सारिएको अघिकारीले जानकारी दिए ।

यसअघि अध्यक्षको चर्चामा रहेका नारायण कोइराला प्रजू प्यानलबाट वरिष्ठ उपाध्यक्षमा चुनाव लड्ने भएका छन् भने अधिकारी प्यानलबाट वरिष्ठ उपाध्यक्षका यदुनाथ अधिकारीले चुनाव लड्ने भएको छन् ।

अध्यक्षको आकांक्षी भनेर प्रचार गरेकी विन्दु कोइराला कांग्रेस प्यानलबाट उद्योगतर्फको उपाध्यक्षमा उम्मेदवार बनेकी छन् । नेकपा निकट व्यवसायीको तर्फबाट उद्योग उपाध्यक्षमा गीता तिवारीलाई उम्मेदवार बनाइएको छ । उद्योग उपाध्यक्षमा उम्मेदवारी दिने घोषणा गरेका गोकर्ण कार्की प्यानलबाट बाहिरिएका छन् । वाणिज्य उपाध्यक्षमा कांग्रेस प्यानलबाट पवन प्रजापतिलाई अगाडि सारिएको छ भने नेकपा प्यानलबाट यमनाथ पौडेललाई उम्मेदवार बनाइएको छ ।

महासचिवमा कांग्रेस प्यानलबाट अर्जुन पोखरेल र नेकपा प्यानलबाट किसन सुनारबीच प्रतिस्पर्धा हुने भएको छ । कांग्रेस प्यानलबाट कोषाध्यक्षमा सुरेन्द्रमान बिजुक्छे र नेकपा प्यानलबाट प्रेम भुजेललाई उम्मेदवार बनाइएको छ भने उपमहासचिवमा कांग्रेस प्यानलको प्रतिनिधित्व चिनु गुरुङले र नेकपाको प्रतिनिधित्व सीता बरालले गर्ने भएका छन् ।

प्रजू प्यानलबाट सदस्यमा बलराम आचार्य, कुमारी मुना बास्तोला, बुद्धिबहादुर गहतराज, ऋषिराम भण्डारी, कृतिबल्लब त्रिपाठी, केशव खत्री, दिनेश बास्तोला, शोभा गौतम, रामेश्वरप्रसाद अधिकारी, रामप्रसाद गौतम उम्मेदवार बनेका छन् ।

यसैगरी, नेकपा सम्बद्ध प्यानलबाट सदस्यमा नारायण पौडेल, डिबी भुजेल, पवित्रा गुरुङ, तेजेन्द्र पौडेल, सोभित पौडेल, नगेन्द्र सुवेदी, नगेन्द्र पोखरेल, चन्द्रा शर्मा, उमराज बास्तोला र रुद्र लुइँटेललाई उम्मेदवारका रूपमा घोषणा गरिएको छ ।

२९ सदस्यीय कार्य समितिमा निवर्तमान अध्यक्ष र सात जना पदाधिकारीबाहेक २१ जना सदस्य रहनेछन् ।

सदस्यमध्ये चार जना वस्तुगत संघबाट निर्वाचित हुनेछन् भने दुई जना कर्पोरेट सदस्यबाट निर्वाचित हुने व्यवस्था छ । एक जना औद्योगिक सदस्य निर्वाचित हुनेछन् भने १० जना सदस्य खुला निर्वाचित हुनेछन् । चार जना सदस्य निर्वाचित अध्यक्षले मनोनीत गर्ने व्यवस्था छ ।

संघमा साधारण सदस्य ३ हजार १ सय ७१ जना, कर्पोरेट सदस्य ६८ जना, औद्योगिक सदस्य १ सय १० जना र वस्तुगत सदस्य २८ सहित ३ हजार ३ सय ७७ मतदाता रहेका छन् ।