मुलुक आर्थिक रुपमा सम्बृद्ध नहुँदा मौलिक हक कार्यान्वयन चुनौती पूर्ण : अध्यक्ष तिमिल्सिना

पर्वत : राष्ट्रिय सभाका अध्यक्ष गणेश तिमिल्सिनाले मुलुक आर्थिक रुपमा सम्बृद्ध नहुँदा सम्म सबै मौलिक हक कार्यान्वयन गर्न चुनौतीपूर्ण रहेको बताएका छन्।

पर्वतको कुश्मामा नेपाल जेसिजको क्षेत्र ख सम्मेलनको उद्घाटन गर्दै अध्यक्ष तिमिल्सिनाले संघीय संसदबाट पारित भएका मौलिक हक सत् प्रतिशत कार्यान्वयन गर्नु चुनौतीपूर्ण काम भएको उल्लेख गरे।  अध्यक्ष तिमिल्सिनाले सबै जनताले कानुनले सुनिश्चित गरेका हक अधिकार उपभोग गर्न सक्नै हैसियत बनाउनुपर्नेमा जोड दिँदै अबको जिम्मेेवारी मौलिक हकको सत प्रतिशत कार्यान्वयन नै भएको बताए।

पेट भोको भएको अवस्थामा हक र कानुनका किताव देखाएर पेट नभरिने भएको भन्दै अध्यक्ष तिमिल्सिनाले त्यसका लागि देशमा सबैभन्दा पहिले आर्थिक समृद्धिको आवश्यकता रहेको उल्लेख गरे। संविधानमा असहमति राख्ने पक्षले समेत मौलिक हक पारित गर्दा सहमति गरेको बताउँदै उनले संविधानले दिएको हक कार्यान्वयन गर्ने वातावरण बनाउने दायित्व सबै राजनीतिक दलले लिनुपर्ने तर्क गरे।

मुलुकमा बिधिको शासन चाहिएको बताउँदै अध्यक्ष तिमिल्सीनाले बिधि र शासन दुईतिर फर्किएमा बिगतकै शैलीले निरन्तरता पाउने र देशको आर्थिक समृद्धि असम्भव रहेको उनको भनाई छ। संबिधानले ग्यारेन्टी गरेका विषय पूरा नहुँदा नागरिक अदालत जाने अवस्था आउने भएकाले त्यसलाई कार्यान्वयन गर्नेमा राजनीतिक एकता आवश्यक भएको उनको ठहर छ।