निर्माण सकिन नपाउदै नारायणगढ–मुग्लिन सडकखण्ड तीन ठाउँमा भासियो

शुभेच्छा न्यूज
चितवन । भर्खरै निर्माण सम्पन्न भएको नारायणगढ–मुग्लिन सडकखण्ड तीन ठाउँमा भासिएको छ । अकस्मात नवनिर्मित सडक भासिएपछि एकतर्फीरुपमा मात्रै सवारी सञ्चालन गरिएको छ। नारायणगढ–मुग्लिन सडक आयोजनाका प्रमुख रोहितकुमार बिसुरालका अनुसार पछिल्लोपटक नारायणगढबाट २६ किलोमिटर दूरीमा रहेको भालुढुंगामा ७५ मिटर लामो सडक भासिएको छ ।

सो ठाउँमा पाँच मिटर चौडा भासिएको हो । करिब २० सेन्टिरमिटर भासिएको छ । सडक विस्तार गर्दा छेउपट्टीबाट पर्खाल लगाइएको थियो । फेदबाट त्रिशूलीको बहाबले धक्का दिइरहेकाले भासिनुका कारण थाहा हुन सकेको छैन ।

त्यसैगरी १७ किलोमा ४० मिटर सडक भासिएको छ । सो ठाउँमा ०६० सालमा ‘स्वायल रक एंकरिङ’ गरिएको थियो । सडक ६ मिटर चौडाइ र दुई मिटर गहिराइ भासिएको छ । वर्षात्को समय भएकाले अहिले नै के गर्ने भन्ने विषयमा निर्णय लिन नसकिएको बिसुरालले बताए ।

यस्तै नारायणगढबाट आठ किलोमिटरको दूरीमा रहेको भतेरीमा ५० मिटर सडक भासिएको छ । सो ठाउँमा १ दशमलव ५ मिटर चौडा सडक भासिएको छ । ‘ग्याभिनवाल’ लगाएर सडक विस्तार गरिएको थियो ।