नक्कली डाक्टर प्रहरी फन्दामा

शुभेच्छा न्यूज
पोखरा। जनकपुरधाम-धनुषाबाट प्रहरीले एकजना नक्कली डाक्टरलाई पक्राउ गरेको छ । अध्ययन नै नगरी सर्वसाधारणसँग ठगी गर्दै आएका नक्कली डाक्टरलाई प्रहरीले धनुषाको शहीदनगर नगरपालिकाबाट पक्राउ गरेको हो ।

पक्राउ पर्नेमा धनुषाको नगराईन नगरपालिका-५ खिरखिरीया बस्ने २५ वर्षीय अक्षयकुमार साह रहेको जिल्ला प्रहरी कार्यालय धनुषाले जनाएको छ । चिकित्सासम्बन्धी कुनै अध्ययन नै नगरी क्लिनिक खोलेर सर्वसाधारणको उपचार गर्दै आइरहेको सूचनाको आधारमा साहलाई पक्राउ गरिएको प्रहरीले बताएको छ ।

साहले शहीदनगरपालिका-३ मा जानकी हेल्थ केयर एण्ड गेठिया बाथरोग सेन्टरको नाउँमा क्लिनिक सञ्चालन गरेर उपचारको बहानामा सर्वसाधारणसँग ठगी गर्दै आइरहेका थिए। कुनै शिक्षा हासिल नगरेपनि उनले डा.एके साहको नाउँमा प्याड बनाएका छन् ।

साथै प्याडमा साहले आफ्नो शिक्षा बीएएमएस (दरभंगा) एचए. (जनकपुर), जेनेर फिजिसियन र सर्जन उल्लेख गरेका छन् । पक्राउ परेका साह उपर थप अनुसन्धान भइरहेको प्रहरीले जनाएको छ ।