धादिङ-पाेखरा सम्पर्क समाजकाे अध्यक्षमा कृष्णबहादुर लम्साल

शुभेच्छा न्यूज
पोखरा। । धादिङ–पोखरा सम्पर्क समाजको अध्यक्षमा कृष्णबहादुर लम्साल चयन भएका छन् । समाजको १० औं अधिवेशनबाट उनी अध्यक्ष पदमा चयन भएका हुन् । धादिङ नीलकण्ठ नगरपालिका निवासी लम्साल समाजको संस्थापक सदस्य हुँदै पटक–पटक सल्लाहकारको भूमिका निर्वाह गर्दै आएका थिए ।

अध्यक्ष पदमा लम्सालसहित ५ जनाको उम्मेदवारी परेको थियो । अध्यक्ष पदमा उम्मेदवारी दिएका केदार धमला, युवराज खतिवडा, गोकर्ण लम्साल र युगमराज अगस्तीले उम्मेदवारी फिर्ता लिएपछि कृष्णबहादुर सर्वसम्मत भएका हुन् ।

यसैगरी वरिष्ठ उपाध्यक्षमा मोहन पण्डित चयन भएका छन् । धादिङ गल्छी गाउँपालिका निवासी उनी यसअघि समाजमा सचिवको भूमिका निर्वाह गरेका थिए । वरिष्ठ उपाध्यक्ष पदमा उम्मेदवारी दिएका शम्भु अधिकारी र हरि पन्तले उम्मेदवारी फिर्ता लिंदै पण्डितलाई सर्वसम्मत बनाएका थिए ।

यस्तै उपाध्यक्षमा प्रेम नेपाली चयन भए । नीलकण्ठ नपाका उनी यसअघि कार्यसमिति सदस्यमा रहेर काम गरेका थिए ।यसैगरी महासचिवमा धादिङ त्रिपुरासुन्दरी गाउँपालिकाका रामप्रसाद पाण्डे राजु चयन भएका छन् । महासचिवमा उम्मेदवारी दिएका प्रकाश दुलालले उम्मेदवारी फिर्ता लिएपछि पाण्डे सर्वसम्मत भएका हुन् ।

यस्तै सचिव पदमा सिद्धलेक गाउँपालिकाकी सरस्वती श्रेष्ठ सरु चयन भएकी छन् ।उम्मेदवारी मनोनयनमै निर्विरोध भएकी उनी सिद्धलेक गाउँपालिका इकाइकी अध्यक्ष समेत हुन् ।

यसैगरी कोषाध्यक्षमा रामकुमार घिमिरे र सहकोषाध्यक्षमा कमलबहादुर सापकोटा चयन भए । घिमिरे यसअघि सहकोषाध्यक्ष तथा सापाकोटा कार्यसमिति सदस्य भएर काम गरेका थिए ।

यस्तै कार्यसमिति सदस्यमा नीलकण्ठ नापाका माधव लम्साल, सीता श्रेष्ठ, गल्छी गाउँपालिकाका विजय श्रेष्ठ, सिद्धलेक गापाका रामप्रसाद दुवाडी, केशर पुलामी, ज्वालामुखी गापाका सरोज कुँवर, देवराज अर्याल र त्रिपुरासुन्दरी गापाका कृष्णप्रसाद थपलिया चयन भएका छन् । सदस्य माधव लम्साल बाहेक अरु सबै नयाँ अनुहार हुन् । लम्साल यसअघि कार्यसमिति सदस्य भएर काम गरेका थिए ।