धनधान्यकी देवी लक्ष्मीको अाराधना गरी कोजाग्रत पूर्णिमा मनाइँदै

शुृभेच्छा न्यूज सम्वाददाता
आश्विन शुक्ल पूर्णिमा अर्थात् कोजाग्रत पूर्णिमा। धनधान्य र समृद्धिकी देवी लक्ष्मीको पूजा अाराधना गरिँदैछ। कोजाग्रत पूर्णिमाको साँझ समृद्धिकी देवी महालक्ष्मीको पूजा आराधना गरी रातभर जाग्राम बस्ने विधान पुराणहरूमा पाइन्छ। यो दिन रातभरि जाग्राम बसी लक्ष्मीको आराधना गर्नाले समृद्धि प्राप्त हुने मान्यता छ।

वर्षको एक पटक यो दिन चन्द्रमाको सोह्र कलाले पूर्ण हुने बताइन्छ। शरद पूर्णिमाको दिनदेखि भगवान् श्रीकृष्णले रासलीला गरेको पुराणमा उल्लेख छ। विजयादशमीका दिन सुरु भएको टीका जमरा लगाउने क्रम पनि बिहीबार सम्पन्न हुँदैछ। विजयादशमीदेखि चतुर्दशीसम्म पनि टीका लगाउन नभ्याएकाहरूलाई पूर्णिमाका दिन बिहान टीका लगाउने र जमरा तथा दशैँका पूजासामग्री सेलाउने चलन छ।

कोजाग्रत पूर्णिमाका दिन नेपालका राष्ट्राध्यक्षले भक्तपुरस्थित नवदुर्गा शक्तिपीठ पुगी दर्शन गर्ने परम्परा छ। राजतन्त्र हुँदा राजा शक्तिपीठ पुग्थे भने गणतन्त्र अाइसकेपछि राष्ट्रप्रमुखको हैसियतले राष्ट्रपति जाने गरेका छन्। वैष्णव परम्पराअनुसार धर्मअनुसार यसै दिन कार्तिक स्नान सुरु हुन्छ।

आकाशमा तारा छँदै बिहान सबेरैतुलसीको पूजा गर्नुपर्छ भन्ने मान्यता छ। साँझमा तुलसीको मठमा आकाशदीप बाल्ने परम्परा छ। एक महिनासम्म कार्तिक शुक्ल एकादशीमा तुलसी विवाह गरी द्वादशीका दिन होम गरेपछि चतुर्मास सम्पन्न हुने पं. बालमुकुन्द देवकोटाले बताए।