पर्वतमा नयाँ प्रजाति ‘लोकतन्त्र’ धानमा बाली नलागेपछि किसान चिन्तित

शुभेच्छा न्यूज संम्वाददाता
पर्वत । फलेवास नगरपालिका–३ शंकरपोखरी, पोखराचौरमा किसानले रोपेको नयााँ प्रजातिकोा ‘लोकतन्त्र’ जातको धानमा बाला नलाग्दा किसान निरास भएका छन् उक्त प्रजातिको नयाँ धान फलेवास नगरपालिकाको कृषि शाखाले सिफारिस गरेको हो।

कृषि प्राविधिकहरुले अन्य धानको तुलनामा दोब्बर फल्ने भन्दै अनुदानमा बीउ बाँडेको भए पनि धान थन्क्याउने बेलासम्म पनि बाला नलागेको स्थानीय सूर्यप्रसाद भुषालले बताए। उनले भने, ‘अरु धानभन्दा धेरै फल्छ, दोब्बरै फल्ने र छिटो पनि पाक्ने भनेर रोपेको अहिले काट्ने बेलामा पनि धान पसाएको छैन।’

धान रोपेको समयमा बेर्ना निकै राम्रो भएको र ठूलो गाँज हाले पनि अहिलेसम्म धान नपसाउँदा किसानहरु चिन्तित बनेको छन्। यस क्षेत्रको करिब १०० रोपनी क्षेत्रफलमा ‘लोकतन्त्र’ धानको रोपिएको छ। तर, धान नै नपसाएपछि एक वर्षका लागि खाने अन्नको जोहो कसरी गर्ने भन्ने चिन्ताले सताएको किसानहरु बताउँछन्।

अन्य जातको धान रोपिएको खेतमा धान झुलेर पहेँलपुर भए पनि नगरपालिकाले नै सिफारिस गरेको धान भने पसाएको छैन। पोखराचौरमा अघिल्लो वर्ष पनि यही जातको धान लगाइएको र उत्पादन राम्रो भएको प्राविधिक कृष्ण तिवारीको भनाइ छ। ‘अघिल्लो वर्ष पनि यही धान लगाएको थियो, परीक्षण भएकै हो,’ तिवारीले भने, ‘अघिल्लो वर्ष .राम्रो फलेको धान यस वर्ष के भयो बुभ्mनै सकिएन।’

प्रतिकिलो ६० रुपैयाँ पर्ने ‘लोकतन्त्र’ जातको धानको बीउ नगरपालिकाको ५० प्रतिशत अनुदानमा प्रतिकिलो ३० रुपैयाँको दरमा किसानले खरिद गरेको थिए। धानको बिउ सिफारिस गरेको फलेवासको नगर कृषि कार्यालयका प्राविधिक ढाकाराम सुवेदीले यस वर्ष धान ढिलो रोप्नु र मौसममा छिट्टै बदली हुनु लगायतका कारणले धानमा बाला नलागेको बताए।