पेट्रोल पदार्थको मुल्य घट्यो,

शुभेच्छा न्यूज संम्वाददाता
पोखरा ।। नेपाल आयल निगम लिमिटेडले पेट्रोल, डिजेल र मट्टितेलको मूल्य प्रतिलिटर २ रुपैयाँ घटाएको छ । खाना पकाउने ग्यास र हवाई इन्धनको मूल्य भने यथावत रहेको छ ।

घटेको मूल्यअनुसार अव पेट्रोल प्रतिलिटर रू. १ सय १२, डिजेल र मट्टितेल प्रतिलिटर रू. ९९ कायम भएको छ ।स्वचालित मूल्य प्रणालीअनुसार सोमवार राति १२ बजेपछि लागू हुने गरी मूल्य घटाएको निगमका प्रवक्ता ई. वीरेन्द्र गोइतले बताए ।

विगत साढे दुई महीनाको अवधिमा अन्तरराष्ट्रिय बजारमा पेट्रोलियम पदार्थको मूल्य उच्चतम विन्दुमा पुगेकाले एक महीनामा निगमलाई रू.२ अर्वभन्दा बढी घाटा भएको बताईएको छ । चालु आर्थिक वर्षको यो अवधिसम्म निगमले रू.३ अर्व ८४ करोड घाटा बेहोरेको निगमले जानकारी गराएको छ ।

मूल्य समायोजन पछि निगमलाई पेट्रोलमा प्रतिलिटर ११ रुपैयाँ ४४ पैसा र डिजेलमा प्रतिलिटर ५ रुपैयाँ ८१ पैसा नाफा तथा एल.पि. ग्यासमा प्रति सिलिण्डर २ सय ८४ रुपैयाँ ८३ पैसा घाटा रहेको बताइएको छ ।