लेखनाथ महोत्सव पुषको पहिलो सातादेखि सञ्चालन हुने

शुभेच्छा न्यूज संम्वाददाता
पोखरा ।‘महोत्सव लेखनाथको संस्कृति, स्थानिय उत्पादन, विकास र समृद्धि’ भन्ने मूल नाराका साथ लेखनाथ उद्योग वाणिज्य संघको आयोजनामा १५ औं संस्करणको लेखनाथ महोत्सव पुषको पहिलो सातादेखि हुने भएको छ ।

विगत १५ वर्ष देखि लेखनाथमा हुँदै आएको महोत्सव आगामी पुषको ५ गते देखि १६ गतेसम्म हुने बुधबार लेखनाथमा आयोजित पत्रकार सम्मेलनमा जानकारी गराइएको हो ।

महोत्सवमा करीव ३ सय ५० स्टल रहने आयोजकले जनाएको छ । हालसम्म ७५ प्रतिशत स्टल बुकिङ भइसकेकका छन्। । संघका अनुसार महोत्सवमा स्थानिय उत्पादन, कृषि प्रदर्शनी, शैक्षिक प्रदर्शनी, सूचना प्रविधि प्रदर्शनी, हस्तकला, मेसिनरी, कर्पोरेट, अटो, जनरल, फेन्सी, गार्मेन्ट, डेरी, खाना लगायतको प्रदर्शनी गरिनेछ ।

त्यस्तै ख्याति प्राप्त कलाकारहरुको दोहोरी, पप कन्सर्ट, हास्य प्रहसन रहने आयोजक लेखनाथ उद्योग बाणिज्य संघका अध्यक्ष कृष्णहरि भण्डारीले जानकारी दिए । महोत्सवमा बाल उद्धान खाना महोत्सव र सुन्तला प्रदर्शनी विशेष आकर्षणको रुपमा रहने उनले बताए ।

महोत्सवमा कवि शिरोमणी लेखनाथ पौड्यालको सम्मानमा देशव्यापी कविता प्रतियोगिता गरिने भएको छ भने लुकेको प्रतिभाको खोजी गर्ने उद्धेश्यले आयोजना हुँदै आएको गायन प्रतियोगिता ‘गण्डकी तारा’लाई यस वर्ष पनि निरन्तरता दिइने भएको छ । यसैगरी रत्यौली प्रतियोगिता पनि आयोजना गरिने जनाइएको छ ।

महोत्सव अबधिभर तीन लाख दर्शकले अवलोकन गर्ने र करीब १५ करोड बराबरको आर्थिक कारोवार हुने अपेक्षा गरिएको संघका अध्यक्ष कृष्णहरि भण्डारीले बताए । करीब ९० लाख खर्च हुने अनुमान गरिएको महोत्सवबाट १ करोड २५ लाख आम्दानी गरी ३५ लाख बचत गर्ने लक्ष्य राखिएको उनले बताए ।

महोत्सवबाट बचत हुने रकमले कृषि उपज खरिद विक्री केन्द्र निर्माण गर्ने, प्रदशनी स्थलको स्तरोन्नती र अन्य सामाजिक क्षेत्रमा खर्च गर्ने जनाइएको छ ।