स्याङ्जामा प्रथम चापाकोट महोत्सव शुरु

शुभेच्छा न्यूज संम्वाददाता
चापाकोट (स्याङ्जा)।स्याङ्जाको दक्षिणी भेगस्थित चापाकोटमा शुक्रबारदेखि प्रथम चापाकोट महोत्सव शुरु भएको छ ।

चापाकोट उद्योग वाणिज्य संघले आयोजना गरेको महोत्सवमा स्थानीय उत्पादनसँग जोडिएका कृषि, पशु, हस्तकला, कुमाल समुदायको लोपोन्मुख अवस्थामा रहेका माटाका भाडा तथा स्थानीय कला, संस्कृतिको प्रचारप्रसार र स्थानीय खानाका परिकारलाई प्राथमिकताका साथ प्रदर्शन गरिने छ ।

शुक्रबार महोत्सवको उद्घाटन गर्दै नेपाल उद्योग वाणिज्य महासंघका पूर्वअध्यक्ष आनन्दराज मुल्मीले यहाँका धार्मिक, ऐतिहासिक एवं सांस्कृतिक महत्वको प्रचारप्रसार गरी यसको माध्यमबाट यस क्षेत्रको आर्थिक समृद्धि गर्न सकिने बताए ।

चापाकोट नगरपालिकाका प्रमुख शिवकुमार गिरीले सामाजिक कार्यमा सबै राजनीतिक दल मिलेर अगाडि बढ्न सकेमात्रै चापाकोट क्षेत्रको समग्र विकास र समृद्धि हुने उल्लेख गरे ।