निर्मलाका हत्यारा पत्ता नलाग्दा आईजिपी तनावमा, अनुसन्धान अधिकृत लिएर कञ्चनपुर लागे खनाल

शुभेच्छा न्यूज संम्वाददाता
काठमाडौं । निर्मला पन्तको बलात्कारपछि हत्या घटनाको अनुसन्धानका लागि प्रहरी महानिरीक्षक सर्वेन्द्र खनाल आफैं कञ्चनपुर लागेका छन् । सिआईबीका प्रमुख डिआइजी निरज शाहीसहित केही अनुसन्धान अधिकृत लिएर उनी कञ्चनपुर लागेका हुन् ।

स्रोतका अनुसार अपराध महाशाखाका डिएसपी रुगम कुँवर लगायत अधिकारीसहित उनी घटनाको बारेमा थप बुझ्न कञ्चनपुर गएका हुन् । पाँच महिना पुग्दा पनि पन्तका हत्यारा पत्ता लगाउन नसकेपछि प्रहरी नेतृत्व संकटमा छ ।

प्रहरीले हाल प्रदीप रावललाई पक्राउ गरी हिरासतमा राखेको छ । तर, उनले बयान स्वीकार गरे्पछि डिएनए रिपोर्ट नमिलेको स्रोत बताउँछ । सोही कारण डिएनए सार्वजनिक गरिएको छैन ।