मनाङमा उच्च हिमपात, जनजीवन कष्टकर

शुभेच्छा न्यूज संम्वाददाता
मनाङ ।चिसो यामको मध्यविन्दुमा मनाङमा लामो हिमपात भएको छ। मंसिरबाट सुरु भएको हिमपात पुस सम्म आउदा क्रमश बढ्दै गएको छ। बिहीबार दिउँसोदेखि हिउँ परेको हो। दिउँसो करिब १ बजे सुरु भएको हिमपात बिहान ७ बजे रोकिएको हो। झण्डै १८ निरन्तर हिमपात भएको हो।

माथिल्लो भेग खांसार, मनाङगाउँलगायत ठाउँमा बाक्लो हिउँ परेको छ। अन्य भू–भागमा भने पातलो परेको छ। जिल्ला सदरमुकाम चामेलगायत तल्लो मनाङ भिमताङ, गुवालगायतका ठाउँमा हिमपात भएको छ। बिहीबार बिहानदेखि यहाँको मौसममा खराबी देखिएको थियो।

’हिमालको वरिपरी कालो बादल देखियो। तीव्ररूपमा हावाहुरी चल्यो’, मनाङ प्रमुख जिल्ला अधिकारी रुद्रनाथ देवकोटाले भने, ‘तापक्रम पनि माइनस २० पुग्यो, हावाहुरीका साथ हिमपात भएको छ।’ माथिल्लो मनाङका गोरे गुरुङका अनुसार हिमपातले जनजीवन त्यति ठूलो असर पारेको छैन। चिसो भने बढेको छ।