पोखरा महानगरपालिकाले चलायो जनप्रतिनिधिकै घरमा डोजर

शुभेच्छा न्यूज संम्वाददाता
पोखरा– पोखरा महानगरपालिकाले मापदण्ड मिचेर बनाएका जनप्रतिनिधिका घरमा डाेजर चलाएकाे छ। महानगरले सार्वजनिक जग्गा फिर्ता अभियानको क्रममा सोमबार पोखरा– ४ का जनप्रतिनिधिले बनाएको संरचना भत्काएको हो।

महानगरपालिकाले वडा सदस्य विष्णुमाया परियारले बनाउँदै गरेको पिल्लर सहितको पक्की घर भत्काएको हो। पटकपटक सूचना पठाउँदा पनि अटेरी गरेकाले भत्काउनु परेको महानगरका प्रवक्ता धनबहादुर नेपालीले जानकारी दिए।

पहिले पनि पटकपटक परियारको सामान जफत गर्दै लगेको नेपालीले जानकारी दिए। परियारले नेपाल स्काउट कास्की शाखासँगैको जग्गामा मापदन्ड विपरीत संरचना जेठ ४ बाट बनाउन सुरु गरेकी थिइन्।

वडा सदस्य परियारले भने आफूले वडाध्यक्ष र मेयरसँग मौखिक सहमति गरेरमात्रै घर बनाएको दाबी गरिन्। उनले सो जग्गा २०४८ सालदेखि नै भोगचलन गर्दै आएको दाबी गरिन्।
महानगरले पोखरा– ५, सिमानामार्गमा रहेको भरत लिगलको ४ कोठे संरचनासमेत भत्काएको छ। व्यक्तिले दाबी गर्दै आएको संरचना कानुनी रुपमै सरकारी भएको प्रमाणित भएपछि भत्काएको हो/ त्यसै पोखरा ५ बुलौंदी खोलाको मापदण्ड बिपरित घर बनाएपछि जमुना क्षेत्रीको घर पनि भत्काएका एको हो/

महानगरले अतिक्रमित जग्गा भत्काउन थालेपछि केही महानगरबासीले ५ दिनभित्रमा आफैं भत्काउने प्रतिबद्धता गरेका छन्। प्रतिबद्धता गर्नेमा युवराज खतिवडाले प्रयोग गरेको रामचन्द्र भण्डारीको घर, वासुदेव आचार्यको ३ कोठे भवन, शान्त बतास १ कोठाको भवन छ। उनीहरुले सोमबार नै महानगरसँग ५ दिनभित्र घर भत्काउने लिखित सहमति गरेका छन्।