सहकारीका सुरक्षा गार्डलाई बाँधेर ३२ लाख पैसा लुट्ने २ जना पक्राउ

शुभेच्छा न्यूज /१ जेष्ठ २०८०, सोमबार १८:३८ , प्रकाशीत

सहकारीको सुरक्षार्थ खटिएका गार्डलाइ बाँधेर पैसा लुटेको आरोपमा प्रहरीले दुई जनालाइ पक्राउ गरेको छ ।

गत बैशाख १७ गते राती काभ्रेको पनौती नगरपालिका– ४ टौखालमा रहेको सामुदायिक बचत तथा ऋण सहकारी सस्थाका गार्डलाइ बाँधेर ३२ लाख नगद लुटेको आरोपमा प्रहरीले मकवानपुरको २ जनालाइ पक्राउ गरेको हो ।

मंगलवार प्रहरीले मकवानपुरको इन्द्रसरोवर गाउँपालिकाबाट उनीहरुलाइ पक्राउ गरेको हो । पैसा चोरी गरी फरार भएका मकवानपुरको इन्द्रसरोवर गाउँपालिका–५ का ३० वर्षीय अशोक रुम्बा र ३५ वर्षीय अकवर लामालाई विशेष सूचनाका आधारमा पक्राउ गरेको मकवानपुर प्रहरीले जानकारी दिएको छ ।

उनीहरूको साथबाट पाँच लाख ४५ हजार रुपैयाँ, एक नाले भरुवा बन्दुक र रडसमेत बरामद गरिएको छ । सहकारीमा सुरक्ष गार्ड भएपनि उनलाई नियन्त्रणमा लिएर रकम लुटेर लगेको सहकारीको दावी गरेको थियो ।

सहकारी चोरी भएको खबर पाएलगतै जिल्ला प्रहरी कार्यालय काभ्रेले तालीप्राप्त कुकुरसहितको प्रहरी टोली अनुसन्धान थालेको थियो ।